L-aħħar jiem ta’ Awwissu jġibu magħhom is-Solennita ta’ Santu Wistin Missierna li fiha l-Knisja tħares lejn il-figura ta’ ta’ dan il-qaddis kbir u tiċċelebrah fost dawk li għexu l-magħmudija tagħhom fil-milja tagħha.

Din hi s-sejħa ta’ dawk kollha li jagħmlu parti mill-komunità nisranija u li huma msejħa biex kontinwament ifittxu lil Alla flimkien u jiċċelebraw il-fidi tagħhom fil-mixja tal-ħajja ta’ kuljum. Din kienet l-esperjenza naturali taż-żgħażugħ Wistin li fittex li jimrah ma’ sħabu saħansitra fl-aktar postijiet imbegħda ‘il barra minnu nnifsu’, u magħhom ukoll qasam dak li sab: lil Alla ‘li kien jgħammar fih’. Dan hu dak li Ommna l-Knisja tistedinna naqsmu flimkien, u ngħixu f’esperjenza ta’ fidi u sinodalità li ma tkunx l-istess mingħajr is-sehem ta’ kull wieħed minna.

Il-kelma sinodu minnha nfisha tirreferi għal assemblea jew laqgħa ta’ smigħ ta’ xulxin. Allura fi kliem sempliċi, r-riflessjoni li qed tistedinna nagħmlu l-knisja bħalissa hija opportunità biex nirriflettu fuq is-sehem ta’ kull wieħed minnha, il-kontribut li kull wieħed jista’ jagħti lill-komunità, il-komunjoni ta’ bejnietna, is-smigħ, u l-attenzjoni għall-xulxin u għal dak li jagħmilna dak li aħna. F’omelija li l-Kardinal Mario Grech kien għamel f’jum is-Solennità ta’ Santu Wistin (Ruma, 2020) fejn tkellem dwar is-sinodalità, kien fakkar li “għal Santu Wistin l-idea tal-Knisja bħala komunità hija waħda inklussiva u mhux esklussiva, dejjem lesta li tilqa’, u miftuħa għal-kulħadd mingħajr distinzjonijiet jew differenzi: il-katoliċità tagħha tesprimi vokazzjoni għat-totalità.”

Din hi l-esperjenza li xtaqt nipproponi għar-riflessjoni tagħna din is-sena, kemm għalina bħala aħwa reliġjużi li għadna kif għexna l-esperjenza ta’ Kapitlu Provinċjali Ordinarju li kienet mument sabih li ġabna flimkien, u anke għalina lkoll bħala Knisja li f’dawn is-snin qed tgħix mixja sinodali. Żgur li dan kollu mhux diskors ġdid, imma jeħtieġ li nibqgħu infakkruh lil xulxin. Bħala mgħammdin (u anke lilna r-reliġjużi bħala persuni kkonsagrati) huwa diskors li għandu jinterpellana aħna u nfittxu li nġeddu kontinwament lilna nfusna u l-istrutturi tagħna.

Illum ngħixu f’soċjeta li minna, aktar milli minn ħaddieħor, tistenna kredibilità u bir-raġun. Aħna skoprejna esperjenza li ġġib magħha responsabilità kbira biex ngħixuha b’mod awtentiku u aktar minn hekk biex naqsmuha mal-oħrajn. Iċ-ċelebrazzjoni tal-qdusija ta’ Santu Wistin hija sinjal ta’ tama li jum wieħed anke aħna għad inkunu qaddisin. L-esperjenza tal-flimkien hija karatteristika intrinsikament marbuta mal-identità Agostinjana tagħna u bla dubju ta’ xejn, esperjenza li s-soċjeta tant għandha bżonn.

Jalla l-komunitajiet u l-istrutturi tagħna jkunu esperjenzi żgħar ta’ sinodalita u tas-sabiħ li nkunu flimkien, li naqsmu l-esperjenza ta’ Alla flimkien u fuq kollox li nkunu xhieda tiegħu f’dak kollu li ngħamlu. Jibqa l-fatt li l-esperjenza kollha tal-‘flimkien’ ma tinbeniex jekk ma titlaqx mill-għażliet żgħar ta’ kull wieħed u waħda minna!

Fr Leslie Gatt osa

Pirjol Provinċjali

Permezz ta’ kunċert ta’ mużika sagra b’kompożizzjonijiet mill-arkivju tal-Kunvent, nhar it-Tlieta 23 t'Awwissu 2022, il-Komunità Agostinjana, flimkien mal-Komunità Parrokkjali laqgħu lura fil-Knisja l-istatwa Titulari ta’ Santu Wistin issa miżbuha u indurata. Matul din l-aħħar sena filfatt l-istatwa ttieħdet biex tinżebah u ssir l-induratura meħtieġa. Għal dan ix-xogħol tqabbad is-Sur Horace Farrugia tal-Imdina li huwa artist ta’ esperjenza kbira f’dan il-qasam. Huwa ħadem b’reqqa kbira l-ewwel fuq il-kisi bil-ġibs u l-iżgraffjar skond il-panneġġjar u l-ilbies tal-figura sabiħa ta’ Santu Wistin. Imbagħad saret l-induratura bid-deheb u ż-żebgħa skond disinji maħluqa mill-istess Horace Farrugia. Ix-xogħol tal-karnaġġjon sar mill-artisti oriġinali tal-istatwa stess, Aaron u missieru Alfred Camilleri Cauchi.

Aaron u Alfred Camilleri Cauchi filfatt kienu ħadmu l-istatwa fl-injam madwar ħames snin ilu u kienet tbierket fis-sena 2017. L-istatwa tirraffigura lil Santu Wistin liebes l-ilbies episkopali bil-qalb taqbad f’idejh. Il-qalb taqbad hija simbolu tal-imħabba lejn Alla u l-Kelma tiegħU li misset il-qalb tal-istess Wistin. Fin-naħa t’isfel tal-istatwa filfatt hemm anke anġlu bi ktieb f’idejh bil-frażi tal-istess Santu Wistin: Vulnerasti Cor Meum Verbo Tuo, li bil-Malti tfisser, Bil-Kelma tiegħek infidtli qalbi Mulej.

Il-proġett riċenti tal-induratura u ż-żebgħa, sar bil-kollaborazzjoni tal-Kunsill Nazzjonali tal-Arti. Ħajr anke lil dawk kollha li b’mod jew ieħor kienu ta’ għajnuna għall-komunità Agostinjana f’din il-mixja, partikolarment il-Fondazzjoni Soċjo-Kulturali Ambjentali Augustina u l-Għaqda Festa Santu Wistin. L-Istatwa ser tinħareġ proċessjonalment il-Ħadd, 18 ta’ Settembru fil-Festa Titulari tal-istess Parroċċa. (Ritratti Ian Noel Pace)

Nhar il-Ġimgħa 26 t’ Awwissu l-aħwa Agostinjani iltaqgħu filgħodu għal mument ta’ talb fil-Knisja Santu Wistin, fil-Belt Valletta u wara komplew jiċċelebraw il-festa ta’ Santu Wistin b’ikla fraterna fir-refettorju tal-istess kunvent. Kien mument informali u sabiħ li fih l-aħwa setgħu jiltaqgħu flimkien għall-festi ta’ Santa Monika u Santu Wistin! Il-Festa t-tajba lil kulħadd!

Nhar it-Tlieta 2 ta' Awissu 2022, kmieni filgħodu, il-grupp Augustinian Youths beda l-mixja tiegħu minn Viana do Castelo fil-Portugal, lejn il-Katidral ta' Santiago de Compostela fi Spanja. Kull ġurnata, għal disat ijiem, konna nerħulha kmieni filgħodu, b'dak kollu li ġibna minn Malta wara dahrna u dejjem aktar navvanzaw lejn id-destinazzjoni tagħna. Qabel tlaqna kollha kemm aħna konna qed naħsbu li d-destinazzjoni hija waħda, dik ta' Santiago, pero fis wara l-ewwel ftit passi tal-mixja tagħna ntbaħna li l-aktar ħaġa importanti huwa l-pass li jmiss. Il-pass li jmiss huwa importanti daqs id-destinazzjoni għaliex bih biss stajna naslu.

Din kienet waħda mill-ewwel affarijiet li ntbaħna li hija parallela għall-ħajja tal-bniedem li jinsab fil-mixja tiegħu lejn Alla. Kull filgħodu konna nibdew b’mument ta’ talb u riflessjoni, u konna nsibu xi kafeterija wara xi tliet sigħat mixi. Din l-istess fakkritna li huwa importanti li wieħed isib mument qasir ta' skiet f'ħajtu fejn ikun jista' jitrejjaq u jirrifletti minn fejn ġie u fejn sejjer, u jippjana l-kumplament tal-mixja tiegħu. Matul il-mixja tagħna ltqajna ma’ diversi pellegrini oħra, kollha mexjin lejn l-istess destinazzjoni pero kollha kemm huma jġorru l-basket ta' esperjenzi u ħsibijiet tagħhom. Tkellimna ma’ diversi pellegrini, u kif waqt il-mixja apprezzajna l-baħar, il-foresti, u l-muntanji, apprezzajna wkoll l-imħabba u r-rispett li l-pellegrini juru lil xulxin u lejn in-natura.

Kien hemm min kien saħansitra lest li jorqod barra peress li kien qed jagħmel il-mixja tiegħu akkumpanjat mill-kelb tiegħu. Din tal-aħħar urietna t-tifsira ta' mħabba mingħajr ebda kundizzjoni, imħabba li tagħti u ma tistenna xejn lura. Il-mixja li għazilna aħna kienet waħda kkaratterizzata minn diversi tlajja. Ħafna gergru u beżgħu mit-telgħat wieqfa pero’ minnufih irrealizzajna li l-niżla kienet ta' periklu akbar. F'waħda mit-telgħat kollha żrar, kien hemm il-passi fondi fiż-żrar ta' xi pellegrin li għadda qabilna. Min minna għażel li juża’ dawk il-passi, fit-telgħa bata inqas. Din fakkritna wkoll fl-umilta' li wieħed għandu jgħix biha, u li meta wieħed iħoss li għandu bżonn l-għajnuna għandu fis ifittixha. Fl-aħħar wasalna Santiago, pero’ meta nitkelmu bejnietna fuq din l-esperjenza m'aħniex insemmu biss lil Santiago imma aktar qed insemmu dak li ltqajna miegħu fi triqitna lejn dik id-destinazzjoni. Dan ikompli jsaħħaħ il-fatt li l-mixja hija importanti daqs id-destinazzjoni. Mela ejja napprezzaw kull mument ta' ħajjitna, ejja napprezzaw lil xulxin (anke dawk li mhux qrib tagħna), ejja nkunu ta' għajnuna għal xulxin sabiex pass wara pass kulħadd jasal fid-destinazzjoni tal-mixja tiegħu!

Typical Day during Camino de Santiago

Last Day of Camino de Santiago

Min ikun jixtieq iktar informazzjoni fuq il-Camino de Santiago u esperjenzi oħrajn jew jixtieq jingħaqad mal-grupp Augustinian Youths, jista’ jibgħat messaġġ fuq il-facebook Page Augustinian Youths jew jitkellem ma’ Fr Terence Spiteri osa fuq This email address is being protected from spambots. You need JavaScript enabled to view it.

Charlon Abela